Arlene Ellis-Schipper: Tin cuido medico brinda na pashent cu no ta necesario

Durante encuentro di Landspakket consehero legal pa minister di salud publico a splica riba bezuiniging. Esaki ta un reto grandi, pasobra tin e sistema di intervencion (systeem interventie) cu ta rekeri inversion di profundidad. Pero no necesariamente bezuiniging ta afecta calidad.

mr. Arlene Ellis-Schipper, Consehero legal pa minister di salud publico, a splica cu bezuiniging ta afecta cantidad di cuido. Esey ta diferente, pa motibo cu asina mes calidad di e dokternan ta keda. Nan tin tur confiansa cu e calidad di cuido ta gewaarborgd (garantisa).

Pero loke ta pasa cu tin hopi overbodige zorg, esta cuido cu no ta necesario. El a duna ehempel na overvragen di cierto test cu no ta necesario. Tambe cierto medicina of terapia cu no ta necesario. E reto ta, pa ta mas critico cu kico un pashent mester di dje. Esey ta nan meta y eynan tin cierto instrument cu AZV ta implementa y conhunto cu tur stakeholders ta mira con pa hacie mas critico, tambe educativo n’e pashent kico ta necesario.

Un ehempel el a duna tabata ora di bay cerca dokter y bis’e pa control completo. E ora ey dokter di cas tin e tarea pa guia e pashent kico mester, paso pa paso, pa por yega n’e diagnostico corecto sin ordo e “million dollar check up.” Segun Ellis-Schipper, esey ta algo ineficiente y no mester di dje. E ta haya cu e cosnan asina mester kita. Si kita ineficiente e ora tin placa p’e cuido corecto y esun cu mester di dje.