Algemene Rekenkamer Aruba (ARA) den su relato encuanto investigacion haci riba Refineria di Aruba (RdA) ta mustra cu e situacion financiero di e empresa aki di Gobierno ta preocupante. RdA ta un di e seis empresanan, fundacion of otro institucion cu a investiga nan maneho y operacion durante tres aña.
E periodo di investigacion na e institucionnan na distancia ta core di 2018 pa 2020. Pero mirando cu RdA ta un N.V. relativamente hoben, pa e presentacion di resultadonan financiero di RdA a tuma e datonan desde e prome cuenta anual di RdA (2017) te cu aña 2021.
Un di e tabelnan den e articulo aki ta mustra cu desde 2019 RdA tin perdida. E capital propio di RdA for di 2018 te cu 2021 a yega casi na mita y baha for di 200 miyon florin na 2018 pa caso 100 miyon na 2021, a consecuencia di e resultadonan negativo cu tabatin.
No tin acuerdo di lease desde 2019
E motibo principal di e resultadonan negativo di RdA ta e echo cu no tin e entrada di acuerdo di lease di Citgo. Por corda cu e compania aki tabata paga un miyon dollar pa aña na RdA, pero a stop esaki desde maart, di aña 2019.
Por corda cu CITGO na april di aña 2020 a dicidi pa pone fin na e contracto cu e tabatin cu Aruba. Segun e investigacion haci door di ARA, den e acuerdo di transferencia cu tabatin cu CITGO na aña 2020 no tabatin ningun palabracion haci riba e pagonan atrasa di CITGO riba e periodo di maart, 2019 te cu februari, 2020.
Nan a nota cu na 2019 tin un suma di 15.3 miyon florin cu no a paga RdA di e lease. Di esaki a dicidi pa “verreken” un suma di 7,7 miyon florin di pagonan (?) cu RdA mester a haci na CITGO. E resto di 7,6 miyon florin entrante 15 di april, 2020, a wordo considera como un suma cu no por cobra mas.
E entradanan den cuadro di e acuerdo di lease cu CITGO na aña 2020 tabata 6.1 miyon florin. Den e aña ey 3.3 miyon florin a wordo bisa di ta “oninbaar”. Den aña 2021 no tabatin nada mas pa cobra of ricibi for di e petrolero.
Di otro banda, na aña 2020 un parti substancial di e resultadonan negativo di casi 43 miyon florin tin di haber cu e gastonan relaciona cu reduccion di balor (8.2 miyon florin) y perdida di participacion, den otro empresa, di 28.4 miyon florin.
Fuels Marketing & Supply Aruba N.V. (FMSA) tabatin un resultado negativo di 13.4 miyon florin na aña 2020 y esun di TdEA (Terminal di Energia Aruba) tabatin un resultado negativo di 15 miyon florin.
Riba e otro grafico por mira resultado di e dos companianan di RdA.
Comment