Den koperashon ku Ministerionan di MEO i VVRP:
AQUALECTRA TA KUMINSÁ REMPLASÁ ILUMINASHON DEN SENTRO DI SIUDAT PA LUSNAN DI KAYA LED INTELIGENTE
Willemstad 13 di Sèptèmber 2022- Aqualectra, den estrecho koperashon ku Ministerio di Desaroyo Ekonómiko (MEO) i Ministerio di Tráfiko, Transporte i Desaroyo Urbano (VVRP) ta kuminsá remplasá iluminashon den área di Punda i Otrobanda ku e lusnan di kaya LED inteligente. Esaki ta promé biaha den 30 aña ku ta kambia tantu e lusnan komo e palunan di lus, pa asina enrikesé e eksperensia den nos sentro di siudat. Na tur lo kambia 793 palu di lus i e lus riba esaki. E trabounan lo tuma lugá entre 15 di sèptèmber i 15 di òktober próksimo. Durante di e trabounan lo hasi publikashon di e kayanan kaminda e trabounan ta tuma lugá. Ta pidi prinsipalmente peatonnan pa tene kuenta ku e trabounan. No opstante echo ku ta trata aki di trabou pa nos tur por gosa mas di nos sentro di siudat, tòg Aqualectra ke ofresé diskulpa pa e inkumbiniensa na esnan ku ta trafiká den e áreanan di trabou.
Instalashonnan di e lusnan di kaya LED inteligente lo hasi nos sentro di siudat aun mas bunita, nèt den e aña ku nos ta konmemorá 25 aña ku Willemstad ta riba e lista di Patrimonio Mundial di UNESCO. E lusnan di kaya LED briante lo duna un otro dimenshon na nos Punda i Otrobanda, pero tambe alsa e eksperensia pa un i tur ku bishitá nos sentro di siudat. E esfuerso aki ta halsa tambe e sentido di seguridat, loke sigur lo yuda enkurashá mas hende pa trafiká den nos sentro di siudat durante oranan di anochi. Meskos ku demas lusnan di kaya LED inteligente, esakinan tambe por keda monitoriá i operá for di un punto sentral na Aqualectra.
E lusnan aki ta mas efisiente den nan uso i nan tin un kantidat di modalidat di operashon, manera por ehèmpel e posibilidat pa halsa i baha nan intensidat riba distansia. Na promé instante ora pone e lusnan aki, lo por parse ku nan ta duna demasiado lus pero lo atendé esaki debidamente den futuro na momentu ku instalá e unidat di kontròl riba nan. Tambe mester remarká ku maske ku e lusnan funshoná den nan ful potensial, tòg nan ta gasta ménos koriente ku esnan konvenshonal komo ku nan ta lusnan LED. E palunan nobo di lus lo trese un elemento modèrno ku ta yuda kontribuí na bunitesa di nos sentro di siudat. Di e forma aki Kòrsou ta dal un paso mas den krea un sentro di siudat ku ta brota di bida i iluminashon, sigur pa loke ta trata e fin di aña ku nos ta aserkando.
Athunto e skema di trabounan den Punda
| Fechanan di trabou den Punda | Kayanan |
| Di 15 pa 18 di Sèptèmber | Breedestraat/Blocksteeg/Windstraat
Waterfortstraat De Ruyterkade/ Rònt Plaza Nobo |
| Di 19 pa 23 di Sèptèmber | Herenstraat/ Trompstraat
Waterfortstraat/ Plaza Piar De Ruyterkade/ Dempelstraat/ Bushalte De Ruyterkade/Rònt Waaigaat/ Fuikstraat |
| Di 24 di Sèptèmber pa 1 di Òktober | Passaatstraat/Wolkstraat
Madurostraat/Prinsenstraat/ Colombusstraat Gouvernementsplein/Sha Capriles Wilhelminaplein De Ruyterkade/ Ront Waaigat/ CIBC FirstCaribbean Bank Waigat/ Plaza Mundu Merced |
