AQUALECTRA TA KONTRIBUÍ NA UN KARNAVAL 2023 INOVATIVO
Willemstad – Selebrashon di karnaval 2023 lo ta unu históriko tantu pa komunidat di Kòrsou i Aqualectra, ya ku e aña aki Aqualectra lo introdusí solushonnan inteligente i modèrno den nos karnaval. Primeramente Aqualectra ta introdusí su Sistema Pre-pago di meter inteligente pa konekshon di awa i koriente riba ruta di karnaval. Ademas, esnan ku bishitá e marchanan di karnaval ku ta pasa den oranan di anochi lo eksperenshá e lusnan di kaya LED inteligente riba henter e ruta di karnaval. Ambos solushon ta forma parti di Aqualectra su esfuerso pa sigui inová i ta kontribuí na halsa e eksperensha karnavalesko pa un i tur.
Introdukshon di e Sistema Pre-pago pa e infrastruktura di meternan inteligente avansá ‘Advanced Metering Infrastructure’ (AMI) riba ruta di karnaval lo sirbi komo proyekto piloto promé ku introdusí e sistema aki rònt Kòrsou. Kontrali na Pagatinu konvenshonal, e sistema aki ta konektá riba uso di meternan inteligente. Ku e sistema aki por kumpra tantu awa komo koriente. Ademas, e Sistema Pre-Pago di AMI ta funshoná ku un pòtmòni digital ku e kliente por usa pa realisá kompra di krédito pa asina hasi uso di koriente i awa. Pa medio di un portal online e kliente por kontrolá e montante ku e tin na krédito den su pòtmòni digital, su konsumo diario, e kantidat averahe di dia ku e por usa awa i koriente ku e montante disponibel den su pòtmòni digital i tur otro aktividat relashoná ku su konsumo. Un eksperensia kompletamente diferente pa loke ta trata servisio pre-pago ku ta brinda benefisionan nobo pa e kliente.
Aña pasá Aqualectra a kuminsá ku e trayekto pa instalá lusnan di kaya LED inteligente na Kòrsou. Ya a instalá e lusnan LED inteligente riba entre otro Schottegatweg, brùg Juliana i tambe nos sentro di siudat. E lusnan di kaya LED aki ta mas efisiente den nan uso, nan ta duna mas iluminashon i ta fásil pa operá for di un punto sentral. Durante e último simannan Aqualectra huntu ku Departamento di Obra Públiko (U.O.O.W) i tambe Ministerio di Ekonomia a instalá 376 lus LED inteligente riba ruta di karnaval, tantu e ruta pariba ku ta inisiá riba Rooseveltweg i kaba na Otrobanda, komo esun na Banda Bou konosí komo Kaminda Próspero “Popo” Rojer. Di e forma aki ta kontribuí na halsa e sentido di seguridat den nos karnaval durante e marchanan ku lo tuma lugá den oranan di anochi. Aqualectra ta spera ku e desaroyonan aki lo kontribuí na un karnaval 2023 inovativo.
