Willemstad 27 di Februari 2023- Anotashon korekto di e posishon di e konsumo di awa i koriente ta base pa un resibu ku konsumo di awa i koriente korekto. Aqualectra resientemente a hasi un kambio den e sistema ku ta registrá posishon di meter. Komo konsekuensia temporal di esaki Aqualectra mester a emití e resibu di desèmber, yanüari i febrüari di varios kliente basá riba un balotashon. Aqualectra ya a tuma e akshonnan nesesario pa koregí i evitá ku esaki lo sosodé atrobe. Den kaso ku e balotashon tabata desproporshonal Aqualectra a notifiká e klientenan por eskrito.
Entretantu Aqualectra tabata preparando pa introdusí inovashonnan ku ta fasilitá klientenan ku meternan konvenshonal ku regularmente ta raportá e posishon di meter riba e dia ku nan mester registrá nan konsumo. E kambio den e sistema pa registrá posishon di meter tabatin un impakto chikí riba klientenan ku meternan inteligente tambe. Den e siguiente faktura Aqualectra ta hasi e korekshon nesesario. Aqualectra ta pidi diskulpa pa e inkumbinensha ku e situashon aki por a kousa. Na mes momentu ta sigui inová pa hasi bida di klientenan mas fásil.
Korekshon di resibunan uso mensual kalkulá
Na luna di novèmber, desèmber i yanüari 2022 Aqualectra mester a balotá konsumo pa un grupo di kliente. Esaki komo ku e empleadonan ku ta pasa na kas chèk meter no por a hasi nan trabou dor di awaseru eksesivo. E klientenan aki a risibí un karta indikando ku tin atenshon pa nan situashon. Aqualectra a kreditá entretantu gran parti di klientenan aki su resibu den e periodo tras di lomba. Lamentablemente, sierto di e klientenan aki no a risibí krédito komo ku nan a kai den e grupo ku a keda afektá atrobe dor di mas awaseru i e kambio den sistema ku a tuma lugá na yanüari 2023. Tur kliente ku a haña un kálkulo for di proporshon ta risibí e karta di Aqualectra kaminda ta indiká ku lo emití un faktura siguiente luna ku e rekalkulashon nesesario. Parti di e rekalkulashon ta enserá tambe e pago(nan) ku e kliente a hasi pa luna(nan) konserní. Por rekonosé krédito ku Aqualectra duna bèk riba e resibu bou di e rúbrika ‘Resibu Akumulativo’ bou di e nòmber ‘Total di Rekalkulashon di konsumo’. Tin ‘CR’ (credit) tras di e montante ku e kliente risibí bèk komo krédito, den kaso ku a balotá e uso muchu haltu.
Awor bo mes por registrá bo konsumo mensual online
Sierto klientenan tin kustumber ku nan ta yama Aqualectra na final di luna via 0800 0135 pa raportá nan posishon di meter konvenshonal. Pronto Aqualectra ta hasi esaki aksesibe, online tambe riba aqualectra.com, pa tur kliente ku ke tin kòntrol di nan konsumo. Den 3 stap fásil bo ta registrá bo konsumo mensual online; chèk e posishon di bo meter di awa i koriente konvenshonal, tene bo resibu na man i skohe e opshon ‘Meter Registry’ pa registrá bo konsumo mensual unabes bo subi Aqualectra.com.
E sistema mes ta dirigí bo pa bo yena e informashon nesesario. Téknikonan di Aqualectra lo sigui pasa i registrá uso aktual di meternan konvenshonal manera ta kustumber, pero si bo mes ke ta na kòntrol di bo konsumo, bo tambe por registrá esaki online!
Meternan inteligente ku registrashon mensual dirèkt
For di desèmber 2021 Aqualectra a bin ta instalá meternan inteligente na Kòrsou. Introdukshon di e infrastruktura di meternan inteligente a bin ta tuma lugá den fase, ku espasio pa asina Aqualectra perfekshoná e sistema kontinuamente. Entrante mart 2023 lo registrá konsumo di klientenan ku meter inteligente pa medio di e sistema mes i di forma outomatisá. E kliente lo tuma nota di esaki riba su resibu indiká komo anotashon SU, loke ta para pa ‘Smart Usage’. Por mira esaki riba e resibu den e rúbrika ‘Spesifikashon di Konsumo’ den e kolòm ‘sistema’. Aqualectra ta pidi komunidat pa un poko indulgensia pa ku e transishon positivo ku ta tumando lugá den e periodo aki.
Athunto: bista unda e por mira e anotashon RU riba resibu di Aqualectra:
