Ta pidi un i tur koperá pa tene demanda abou
AQUALECTRA A SUMINISTRÁ KÒRSOU KU KORIENTE NO OPSTANTE DEMANDA RÈKÒRT DI 138.5 MW
Willemstad – Djaluna 5 di Sèptèmber Kòrsou a konosé un demanda di koriente rèkòrt ora ku rònt di 10’or di anochi e demanda pa koriente a kibra rèkòrt i a yega 138.5 MW. Esaki ta muchu mas haltu ku e demanda rèkòrt ku a keda registrá na 2016 di 133 MW. E demanda rèkòrt aki a surpasá e 135 MW na kapasidat ku Aqualectra tin disponibel aktualmente pa operá seif i ku un márgen di seguridat. No opstante e demanda históriko aki, Aqualectra a logra tòg pa proveé komunidat ku e koriente kustumbrá pa asina por a pasa e anochi sin tin ku apliká e sistema di ‘skakel’.
E dianan aki no tin bientu pues no por konta ku un produkshon haltu di e mulinanan. Ayera por ehèmpel e mulinanan di bientu a kontribuí ku solamente 3.5 MW na e total di 138.5 MW produsí. E proyekshon te ainda ta sinembargo ku pa djaweps i djabièrnè lo no tin bientu, kual tambe mester sigui monitoria.
Basá riba e pronóstiko di wer akí por konta ku e próksimo anochinan tambe e kalor lo sigui reina. E rísiko ta keda haltu ku si e demanda surpasá e 135 MW Aqualectra lo hañ’é obligá di pasa pa e programa di ‘skakel’ pa por sigui suministrá komunidat ku koriente.
Athunto un bista di e total na kapasidat di produkshon ku Aqualectra tin:
| Ekípo | Kapasidat |
| Mashinnan Konvenshonal | 151 MW |
| Turbina di Gas | 22 MW |
| Bientu | 46.5 MW |
Aktualmente tin dos unidat di produkshon di disel ku pa un periodo largu ta for di funshonamentu i ta premirá ku pa Òktober nan lo ta bèk den funshon. Banda di esaki tin un otro unidat di produkshon di disel ku ta pasando den un mantenshon grandi. E unidat aki lo ta disponibel atrobe pa produsí na Yanüari awor.
E averahe di e demanda durante e último dianan ta 115 MW, mientras ku e averahe mas haltu durante dia ta 135 MW.
Pa e motibu aki Aqualectra ta pidi koperashon di komunidat pa, no opstante e kalor ku nos ta eksperenshá, pa limitá uso di koriente na loke ta nesesario entre 10’or i 12’or di awe nochi i e próksimo dianan. Aqualectra di su banda ta hasi lo máksimo pa por kumpli ku e demanda nesesario pa komunidat.
Ku koperashon di kada un di nos tur, nos lo por logra pasa e tempunan aki di kalor.
