Anouk Eman: Mester di cifra di mucha cu necesidad special pa haya ayudo financiero 

Departamento di Mucha y Hoben (DMH) ta trahando riba un proyecto piloto di intervencion trempan pa e muchanan cu necesidad special den e centronan di cuido di mucha. Cu e proyecto piloto aki kier haya mas data dje mucha cu necesidad special. Tambe e meta ta pa mira si e mucha ta yega na su desaroyo unda e mester ta of no.

Anouk Eman, lider di proyecto, tin diesocho luna trahando riba e proyecto di intervencion desde trempan. El a conta cu tempo e tabata studia na Merca, e tabata haciendo su master y a haci su tesis dje situacion actual di Aruba di un sistema di intervencion trempan cu no tabatin. Eman a haci su tesis y su docente tabata sorpresa cu no tin nada di esey aki na Aruba.

Despues cu el a regresa Aruba, el a haya e trabou pa cuminsa cu e proyecto aki. E persona cu el a yama tabata dokter Kelly, kende tin diesocho luna yudand’e cu e proyecto aki. Tin un draft, un sistema cu ta bay cuminsa den e centronan di cuido prome. E proyecto aki ta uno piloto, nan ta bay test e prome y eventualmente nan kier p’e ta un sistema nacional pa asina yena e buraco di dos te cuater aña, cual no tin un bista riba dje.

Tambe nan tin Plataforma Intervencion Trempan Aruba (PITA) cu tur e stakeholders di cual nan ta sinti di ta forma un parti importante dje proyecto aki. Eman a sigui indica cu nan a uni tur hende hunto. Incluso si tin persona cu ta sinti cu nan ta forma parti importante, di cual e por ta un mayor y no un instancia, ta invita nan pa ta parti di esaki.

Loke nan kier demostra ta yega prome na un data. Eman ya caba ta conseha e muchanan caba na centro di cuido. A trata diesdos mucha caba. Su meta p’e aña aki ta yega 30 mucha. Cu e data aki nan kier busca fondo internacional. Varios biaha ta papia cu tin hopi mucha, pero e kier sa di cuanto ta papiando di dje. Tambe e sa cu tin placa eyfo, pero mester demostra cu number kico ta e situacion actual pa haya ayudo financiero.

Pa mas lesa TREMPAN.COM.