Anochi di Poesia a conoce otro temporada exitoso

Diaranson anochi tabatin den Café Chaos e ultimo edicion pa e temporada 2022 di Anochi di Poesia of Poetry Night, manera e ta mas conoci. Adicional na e obranan literario cu un y tur ta disfruta, e evento a rindi tambe un homenahe postumo.

Basha Foundation, como organisado di Poetry Night, ta sumamente satisfecho cu e manera con e temporada 2022 a transcuri; uno den cual por a reanuda e encuentro artistico di forma fisico. Hopi ta e poeta, declamador y publico di tur edad y origen cu a bini hunto na diferente luga tanto pariba, como pabou di brug.

Poetry Night ta un esfuerso cu ta fomenta un lazo mas estrecho den comunidad, ademas di brinda un plataforma hopi necesario pa esunnan cu kier presenta y expresa nan opinion riba asuntonan social, idea of emocion a traves di e arte cu ta palabra skirbi y recita.

E ultimo edicion aki di Poetry Night tabata marca pa un momento hopi special y emocional caminda e grupo a rindi un tributo na e memoria di Charlene Loopstok, un fiel participante di e evento y un figura hopi stima. Charlene a fayece algun dia atras cu apenas 31 aña, lagando atras hopi recuerdo y experiencia bunita cerca tur cu a comparti cu ne.

Un danki grandi y di curazon ta na su luga pa Prins Bernhard Cultuurfonds como patrocinador principal di Poetry Night, mescos cu na Aruba Bank, Setar y Vibration PR hunto cu tur individuo cu, di un manera of otro, ta hacie e anochinan aki posibel. 

Si bo ta interesa pa haya mas informacion di Poetry Night, sigui e cuenta di Basha Foundation riba plataformanan social y keda pendiente pa dos posibel Pop Up prome cu fin di aña.