Amnesty International kier reunion cu Comision Husticia di Parlamento

E organisacion cu ta bringa pa e derechonan humano di tur hende rond mundo, Amnesty International su departamento di Hulanda a pidi Comision Husticia di Parlamento pa un reunion. Esaki lo mester tuma luga dia 19 di october proximo.

E representantenan lo kiee splica e parlamentarionan, kico tur nan a haci y kier scucha alabes di parlamento nan punto di bista riba e desaroyonan rond di e indocumentadonan.

Director di Amnesty International Nederland Dagmar Oudshoorn-Tinga a manda un carta cu e peticion. E organisacion aki a saca un rapport negativo tocante e situacion di Venezolanonan indocumenta na Corsou, titula “Nog steeds niet veilig; Venezolanen krijgen geen bescherming in Curaçao”.

E conclusion den e rapport ta, cu e Venezolanonan cu a huy nan pais pa bin busca un miho biba aki na Corsou, tin biaha cu nan yiunan, semper ta bay cera den diferente circunstancia inhumano. Nan no tin acceso na un procedura di proteccion honesto y haci cu cautela.

E director ta indica den su carta na e comision, cu entretanto tin hopi cos mas cu a pasa riba e tema aki, fo’i despues di e investigado Boof Tonella su bishita na minister-president Gilmar Pisas na maart ultimo. Nan tin hopi gana di splica parlamento kico tur esakinan ta. Ta algo cu a yega di priminti e comision anteriormente. Na e momento aki, Amnesty International Nederland ta investigando e situacion di migrantenan na Aruba y ta monitoria e situacion na Corsou.

P’esei Oudshoorn-Tinga y Tonella ta bolbe bishita e paisnan aki. Dia 19 di october nan lo ta na Corsou y lo kier reuni cu e Comision Husticia di Parlamento e ora ey, pa scucha tambe con e parlamentarionan mes ta pensa tocante e tema aki. Alabes nan lo duna e comision e resultadonan di nan investigacion te cu e tempo dje reunion.