Amigo Etty, bon amigo y un ruman di cas

Semper bo a considera Chomon y mi persona Debby, como bo rumannan y mi suegra bo a yama semper Mama. Bo tabata cerca di nos famia na tur momento, den bon tempo y den mal tempo, algo cu hamas nos lo lubida.

Etty semper cu bo gran amistad y musica, bo a alegra nos bida, percura pa tin harmonia entre famia y amigonan.nBo amistad leal y stimacion pa nos como bo ruman, bo a confirma na luna di februari di e aña aki, ora cu a pidi pa toca den misa pero bo a nenga prome pasobra ya bo tabata sinti hopi malo.

Ora cu bo a tende cu ta Pedro Buchi, ruman di Chomon, mesora bo a dicidi cu bo mester tey, confirmando bo sinceridad fraternal, cu realmente nos ta bo famia. Bo a toca pa servicio di Misa di mama di Chomon y asina por sigui menciona cantidad di encuentronan cu nos tabatin hunto como “famia”, como ruman, loke bo tabatin cu hopi otro hende tambe. Siman pasa nos a bishita Bo, nos a papia pa ultimo bes, sin despedi ya cu nos lo topa un dia ora cu Dios dicidi cu esaki lo tuma luga.

Sosega bon amigo, cu bo ser ricibi den Reino di Señor cu musica y canto celestial di Angelnan, manera bo tambe e deleita tur hende riba e mundo aki cu bo musica y amistad. Gran amigo Etty, sosega na Paz, bo merece como gran hende y como gran amigo.

Chomon y Debby