Alzheimer t’un topico alarmante na Aruba

Diamars anochi a tuma luga, un anochi informativo na Centro di Bario Savaneta, organisa pa Fundacion Alzheimer Aruba. Durante e encuentro, a conta riba e importancia y señalnan di Alzheimer. Leo Croes ta miembro di  directiva di e fundacion. Croes durante un entrevista cu 24ora.com a conta cu e evento ta den cuadro di Dia Internacional di Alzheimer, cual ta 21 di september. A haci un serie di actividad rond Aruba pa informa e comunidad riba e importancia. A haci esaki por medio di presentacion pero tambe comunicado di prensa.

A cera e siman di cinta teal (color teal) cu a cuminsa riba 21 di september 2022, pero debi na contratiempo a dura mas cu a spera. Na banda di e informacionnan relaciona cu Alzheimer, tambe a papia riba; kico ta spera Aruba pa cu e situacion di edad y hende grandi. Den cuadro di esey, por anticipa e cantidad di hende cu edad halto den nos comunidad. Si mira CENSO 2010, unda cu tabatin pa cada 100 mucha bou 15 aña, tabatin como 50 persona di edad. Awo, e cifra aki a bira dobel. Por mira cu den un lapso di dies aña, e cifra pa cu hende di edad a aumenta compara cu persona bou 15 aña.

Den cuadro di e siman di cinta teal, tambe a organisa un misa pa recorda e personanan cu ta sufri di alzheimer y pa nan cuidadonan. Ta importante pa ta na altura riba e tema aki, pero no ta tur ora e famia ta capacita con pa atende cu ne. E pashent ora detect’e cu alzheimer ta bira hopi dependiente di su famia y esunnan rond di dje, pa e por keda activo. Tin ora e cuidado ta bira malo prome cu tempo, pues tambe a informa riba e importancia pa nan cuida nan mes ora ta atende cu un pashent di alzheimer.

Si mira den Caribe, tin un estudio haci riba alzheimer, actualmente por conta cu un total di 6.5% den e categoria riba 60 aña. Ta premira hasta cu tin mas o menos dos mil pashent cu ta sufri di alzheimer. Pues un situacion alarmante, por anticipa cu pa aki dies aña e cifra aki lo subi hasta te cu tres mil pashent.