Alvin Molina (MEP): San Nicolas lo ta un punto importante den gobernacion

Diamars a tuma luga e ceremonia di apertura di Aña Parlamentario nobo pa 2022-2023. N’e ocasion aki, 24ora.com/TREMPAN tabata presente pa asina trece lo ultimo den informacion pa su lesadonan.

Tabata prome bes cu Parlamentario Alvin Molina (MEP) ta experiencia clausura y apertura di Aña Parlamentario. El a indica cu como parlamentario el a entrega varios mocion durante aña y e siguiente aña ta bira un reto pa core tras di e mocionnan aki, pa wak di ki manera por ehecuta nan. Por entrega mocion, pero e parti importante ta pa ehecuta nan.

Pa loke ta e remarca haci pa parlamentario Raymond Kamperveen (RAIZ), unda cu el a trece dilanti cu e lo desea di mira un sorto di entrenamento pa e parlamentarionan nobato, ta un idea cu Alvin Molina ta comparti. Partido MEP actualmente ta trahando riba Fundacion Nel Oduber, cu lo mester train esunnan cu ta den Parlamento caba y siña nan e historia.

Pa loke ta e discurso di S.E. Gobernador di Aruba, Alfonso Boekhoudt, un di e puntonan cu mas a hala su atencion ta e desaroyo di San Nicolas. Con San Nicolas por aporta na e economia di Aruba, manera antes. Y esaki lo bira un di e puntonan mas importante den e gobernacion aki, cual no ta nada straño, ya cu a firma e acuerdo di gobernacion na Kulture Cafe na San Nicolas. Gobernador a menciona un ehempel tambe di con ta logra esaki, cu ta pa medio di agricultura. Molina a sigui bisa cu su persona mes a entrega varios mocion relaciona cu agricultura. E autoridad mas halto den agricultura ta Santa Rosa, cu lo mester haya un posicion mas prominente, cu mas autoridad, c’un network mas amplio y hermentnan mas efectivo pa haci un trabou pa agricultura, pa cu San Nicolas y alabes pa Aruba.