Alvin Molina (MEP) na Robert Candelaria: Reconoce polis cu promocion na tempo

“Palabranan di pabien na Robert Candelaria, cu su promocion pa comisario di polis. Un promocion na su luga mirando cu el a eherce e funcion di Hoofdinspecteur pa varios aña prome cu el a bay den sector priva. Sigur un vacatura cu mester a wordo yena dos aña y mey pasa caba, pa asina haci e ekipo di maneho di KPA completo y mas fuerte bek”, asina parlamentario Alvin Molina a bisa. E mes tambe tabata altoinspector den Cuerpo Policial Aruba y tabata encarga cu e polisnan uniforma den e districto di Oranjestad.

“Pabien tambe na korpschef Ramon Arnhem y Minister di Husticia Rocco Tjon. Ta esencial cu mando policial ta completo pa asina duna un servicio optimal na tur polis.”

E ex-altoinspector, awendia parlamentario, a admiti cu un di e retonan structural den Cuerpo Policial ta e proceso di promocion. Polisnan ta warda añas sin claridad ki tempo nan lo ricibi e promocion y e “rechtspositie”cu nan merece. Causa di esaki ta procesonan interno den KPA cu no ta cana bon, combina cu procesonan cu ta tarda demasiado largo na Departamento Recurso Humano. Mester evalua ambos trayecto y unda necesario adapta, pa asina polisnan por ricibi loke nan merece den un tempo rasonabel. Mirando cu varios polis ta tranca den nan posicion huridico pa basta tempo caba, hasta mientras ta eherciendo un funcion pa hopi aña.

Na final, Parlamentario Alvin Molina a enfatisa cu e ta haci “Un suplica na Robert Candelaria pa di su banda promove e trato husto di nos coleganan. Polis cu ricibi loke nan merece ta mas motiva pa duna pueblo di Aruba e servicio cu e merece. Mi ta en espera di korpchef Arnhem pa bin Parlamento y duna un splicacion di su vision y su plan con e lo logra e vision aki, specialmente pa su coleganan cu ta percura pa nos isla ta mas sigur posibel. Exito na Candelaria den su funcion nobo.”