Alvin Molina (MEP): Mester un solucion p’e camindanan peligroso den San Nicolas 

Parlamentario di MEP, Alvin Molina, ta haya cu na San Nicolas tin caminda cu ta peligroso y mester un solucion pa esakinan. El a manda mocion unda a haci peticion pa bin cu rotonde, pero tambe a pidi pa pone polis drumi.

E parlamentario a indica cu diabierna ultimo nan tabata presente na e apertura di rotonde di Palm Beach y esey lo yuda cu e fluho di trafico den e area. Tambe ta haci cu e caretera mas sigur. E parlamentario a manda palabra di pabien na minister di Infrastructura, DOW y e partnernan. Incluso el a felicita pueblo di Aruba c’un bunita logro.

MOCION PA CONSTRUI ROTONDE

E ta corda cu antes tabatin un spiel poni riba e edificio den skina, cu tabata yuda e automobilista mira e vehiculonan cu tabata bin di pabou. Asina ey por a calcula ora di subi e crusada. Pero awo e spiel ey no t’ey mas. Como cu e crusada aki ta uno peligroso, aña pasa na october el a entrega parlamento un mocion. E mocion aki a ricibi aprobacion unanime di parlamento pa construi un rotonde n’e crusada.

HAYA APROBACION

E parlamentario a ricibi contesta fo’i DOW cu e caminda ta parti di Green Corridor y ta cay bou maneho di Caribbean Infrastructure Companies. Esey ta significa c’un rotonde riba e caminda ey lo tin extra gasto cu ne, pero lo mester aprobacion di e compania na Colombia hasta te na Merca pa por pone un rotonde riba e caminda. 

PETICION PA POLIS DRUMI

No solamente e crusada aki ta un peliger, segun Molina, despues di a papia cu varios habitante y inventarisa nan preocupacion, tin mas caminda cu trafico por y ta forma peliger pa material. Aki el a referi na cas, cura di cas, auto staciona, pa e habitantenan cu tin miedo di sali fo’i cura, e muchanan cu no por hunga riba caya, ta obvio cu ta trata di area habita.