Alvin Molina (MEP): Kico inversionista internacional ta trece pa Aruba

Ora un inversionista di afo bin Aruba, ta importante pa nos evalua ki beneficio e ta trece pa nos isla. Esaki ta conta tambe pa inversionista hotelero, por ehempel cuanto cupo di empleo local e ta crea y e forma con e ta trata su empleadonan Arubiano. Nos hendenan local lo haya e oportunidad pa ocupa funcion den tur departamento y tambe como ehecutivo? Esaki ta un topico cu nos a papia di dje durante nos bishita na Hotel Secrets na San Nicolas, cu ta den fase di construccion. 

Alejandro Murcia, representante di gerente di e hotel, a garantisa nos cu e lo haci uzo mas tanto posibel di trahado y contratista local. Den practica esaki por nifica cu Secrets lo pone un aviso den corant y haci un yamada na Departamento di Labor cu e resultado cu toch mayoria di hende mester busca di afo. Esaki mientras cu tin hopi Arubano cu mester un trabou of ta buscando un manera pa crece. 

Den e caso di Secrets lo tin hopi hende cu ta biba pariba di brug y ta desea pa traha mas cerca di cas, pa spaar placa di transporte y tambe lo resta mas tempo pa inverti den nan famia y salud. 

Den mi opinion e responsabilidad di un inversionista di e magnitud aki mester bay mas leu. P’esey, mi a haci peticion na Minister di Labor y Minister di Turismo pa percura cu Murcia cumpli cu e promesa cu el a duna nos den nomber di Hotel Secrets. Den caso cu tin Arubiano pa traha, pero nan falta conocemento, e ora Secrets por colabora cu Ministerio di Enseñansa pa “her-, om-, bijscholing” di nos hendenan. 

Tin mas cu un aña y mey ainda pa realisa esey, prome cu e hotel habri su porta. Inversion ta grandi, ganashi ta grandi, responsabilidad pa cu nos pais tambe ta bira mas grandi.