Alvin Molina (MEP): Gobierno mester inverti den cunukero local pa por tin tarifa rasonabel
Diasabra ultimo, mi a bishita e famoso “Farmer’s Market” di STR Agriculture Farm na Alto Vista. Na unda cu mi a ricibi informacion actualisa di e ultimo desaroyonan relaciona cu agricultura. Fuera di esaki, mi a ricibi un recorido di e mercado y cunucu.
Manera ta conoci, tur diasabra di 8:00 am pa 12:00 pm pueblo di Aruba y nos bishitantenan ta pasa na e mercado pa cumpra nan berdura y fruta fresco. Ademas di esaki, tin diferente tent di artesano cu e productonan traha na Aruba.
E proyecto aki ta un colaboracion di diferente entrepreneur agricola (agripreneurs) local cu a uni pa crea un plataforma, unda cu nan por bende nan productonan. STR Farm ta cultiva diferente berdura y fruta, entre otro, concomber, tomati, spinazie, bonchi largo, yambo, lechuga, y patia a traves di e sistema tradicional y moderno di cultivacion.
Mi ta urgi tur minister concerni pa sigui inverti den e industria aki y inverti den e cunukero local pa nan ricibi e cooperacion pa haya awa di calidad, energia, tereno y enseñansa. Nos mester percura pa Aruba logra un “food security”, esta cuminda di calidad na un tarifa rasonabel cu e meta pa produci un gran parti di e cuminda na Aruba mes. Mi ta felicita Joe Ramadar, staf y personal di STR Agriculture Farm cu e bunita proyecto aki y mi ta gradici nan pa aporta na Aruba su siguridad di cuminda (Food Security).
Comment