Alexandra van Huffelen: Dia 21 di october ta dicidi si Aruba ta haya aanwijzing

Riba e ultimo dia di IPKO Secretario di Estado, Alexandra van Huffelen a reacciona riba Aruba y a indica cu dia 21 di october lo dicidi si ta haya un aanwijzing. Secretario di Estado tin speransa cu Aruba no haya esaki, pero tur cos ta depende den e siguiente reunion di Rijksministerraad.

Van Huffelen a indica di no a tuma un decision ainda riba un aanwijzing. Nan no a papia riba e propuesta haci dje conseho di Cft. Nan ta bay trata esey pa dia 21 di october, pero awe a trata e sosten di likides di tur tres isla. Dos isla no a pidi sosten di likides, el a indica. Aruba y Corsou no a pidi esaki, pero Sint Maarten si. Pa esey nan a acorda e sosten pa di tres y cuater kwartaal, y e suma completo pa Sinit Maarten ta di 24 miyon florin.

Secretario di Estado a reacciona riba e pregunta cu si no tin pura pa atende cu asunto di Aruba y a indica cu mester sigui e procedura bon. Esey ta significa cu no ta keda solamente na e conseho di Cft, pero cu tin posibilidad pa Aruba reacciona. El a sigui indica cu esey ta loke e gobierno a haci y ainda falta pa gobierno di Hulanda mir’e. Y hunto nan tin cu tuma un decision cu lo tuma luga n’e siguiente reunion di Rijksministerraad.

Mester di tempo, pasobra e ta bay den fase y e ta un conseho di peso. Ora ta trata di conseho fuerte nan tin di papia bon cu otro y asina ey den e siguiente encuentro di Rijksministerraad ta tuma un decision.

Ainda e tin speransa cu Aruba y Cft tin e mesun resultado. Van Huffelen a indica cu ta trata dje hendenan mes riba Aruba cu tin e necesidad pa tin e finansa publico den control. Asina ey tin espacio pa despues por tin e placa pa combati pobresa, enseñansa, bon caminda, atende cu e problemanan di medio ambiente, pa tur cos cu bo mester. Tur cos cu bo mester, tambe bo mester placa di gobierno.

E esencia constantemente ta dje topico. Tambe mester di un presupuesto 2022 cu tin menos deficit. Van Huffelen ta spera cu Aruba ta bay traha riba esey, aunke tambe e sa cu ta trahando. Un cos e ta spera cu Aruba no mester haya un aanwijzing, pero lo mira esey den e siguiente reunion. Ta den man di su persona, pais Aruba, prome minister y gobierno pa percura cu finansa publico ta den ordo y asina no solamente awo, pero pa futuro cu por sigui inverti.