Ainda no tin sancion ora mayor kibra ley di leerplicht 

Den declaracionnan haci diabierna mainta, John Hessen, director di Inspectie Onderwijs a duna di conoce cu Leerplicht ta forma parti di actualisacion di ley andando. Ta reconoce cu tin aspectonan den Leerplicht ta desea di cambia, principalement esun di sancion y esey no ta un secreto. Awendia ainda un mayor por djis hisa bela y bula bay cu e mucha cu ta bay perde scol. Mas e echo cu no tin sancion, no kier men cu e no ta keda raporta door di e scol y registra na Leerplicht.

E ley debidamente ta haci mencion di sancion, pero no ta aplic’e ainda pasobra tin hopi cos pa regla prome cu por yega na esey. Hessen: “Esey ta e cosnan cu awo ta bay haya atencion. Tur cos ta bon stipula den ley. Awo cu ta bezig cu ne, ta ripara cu tin su gebreken cu mester bay adapta.”

Asina mes, e oficina ta funcionando y scolnan, di nan parti, ta cumpli cu raporta ora un mucha a falta mas cu dies di scol sin un motibo valido.  “E sistema ey ta in place. Esey no ta e problema,” segun Hessen.

Loke ta bay traha riba dje awo ta e parti practico di aplica e sancion paso tin cu wak mas leu cu djis duna un boet. Kiermen cu si ta sanciona un mayor cu no ta manda su yiu scol, pero e mayor ey no tin trabou, con e ta paga e boet? Tur esey tin di wak y esey ta e discusion cu tin awo, segun e director di Inspectie Onderwijs.