AHATA su Comision di Medio Ambiente a duna presentacion na varios compania

Aruba Hotel & Tourism Association (AHATA) su Environmental Committee (Comision di Medio Ambiente) a duna un presentacion diahuebs atardi den Alhambra Ballroom na varios companianan chikito y mediano. E comision  ta consisti di diferente representante boluntario cu ta lidera practica di sostenibilidad na e companianan miembro di AHATA. 

Pa conmemora ‘Earth Day’ aña pasa, AHATA a distribui su guia di ‘Environmental Best Practices’ cu e meta pa motiva compania miembro pa implementa practica di sosteniblidad den nan operacion diario. E aña aki a scoge pa haci un presentacion cu ta complementa e informacion brinda den e guia y duna ehempelnan practico di companianan local cu ta tumando pasonan den e area di sosteniblidad. E  presentacion di e comision ta ilustra e beneficionan pa nos medio ambiente y e beneficio financiero pa companianan cu ta compromete nan mes na sostenibilidad. 

Topico presenta den e sesion a inclui: e tres pilarnan di sosteniblidad (social, ambiental, y economico) y e sistemanan principal di reduci, reuza, recicla y reutilisa. A ilustra kico ta sosteniblidad den un negoshi, conservacion di awa y coriente, mantenemento preventivo, y trabao boluntario pa bienestar di nos comunidad. Un elemento importante tambe ta con pa involucra empleadonan den e proceso di sostenibilidad. Na final, e comision a ofrece un ‘mentorship program’ pa yuda e companianan miembro introduci sosteniblidad den nan compania cu practicanan basico.  

E presentadornan tabata John Wardlaw di Tropical Bottling Company, Miriam Stuurman di De Palm Island, Ryan Bareño di Marriott’s Aruba Surf Club, Andrew Rasmijn di Marriott’s Aruba Surf & Ocean Club, y Daniel Aguirre di La Cabana Beach Resort. Otro miembronan di e comision cu a yuda cu  planificacion y ehecucion ta Astrid Winterdaal di De Palm Tours, y Vanessa Rasmussen y Laura Molina di AHATA. 

Na 2023 AHATA su Comision di Medio Ambiente tin diferente projecto planea, incluyendo bishita scolnan primario y secundario pa crea mas conscientisacion den nos comunidad. Por sigui e pagina di Facebook di AHATA Environmental Committee pa mas informacion y tips con pa biba mas consciente y yuda proteha nos medio ambiente.