AHATA: Aumento di utilidad y introducion di BTW lo ta e “Perfect Storm”

Aruba Hotel & Tourism Association a tuma nota di e anuncio cu tarifa di awa y coriente na Aruba a hisa substancialmente pa henter comunidad. Considerando e realidad di inflacion cu nos tur ta experienciando caba como consecuencia di e problema global cu cadena di suministro y e prijs di petroleo, por spera cu e ahuste di tarifa di utilidad lo hisa costo di bida y costo di comercio ainda mas y haci Aruba hopi mas caro pa un y tur.

Si gobierno dicidi di introduci un tarifa halto di BTW cu un reforma fiscal na 2023, esey lo crea un tormenta perfecto pa nos isla cu lo multiplica e efecto negativo di e 3 factornan (inflacion global, tarifa di utilidad, y tarifa halto di BTW) riba nos economia y bida diario di nos residentenan.

AHATA ta di opinion cu pa motibo di e inflacion enorme den nos futuro cercano, ta prudente pa reevalua e tarifanan di BTW cu gobierno tabatin planea pa introduccion na 2023 y pone mas atencion riba corta gasto gubernamental pa evita di crea un situacion mas intolerabel pa Aruba.