Awenochi 15 di desèmber pa 6.30 ‘or di anochi lo sende e adorno di pasku ku èks trahadónan di Refineria a diseñá i traha na Post 5. Proksimamente lo tin e apertura ofisial.
E adorno ta konsistí di entre otro e pesebre di kustumber, pero e aña aki e ta den un bachi ku ta simbolisá e proseso ku refineria ta aden aktualmente. E mensahe prinsipal di e adorno e aña aki ta: Sigui perserverá, pasó ora bo sigui perserverá lo bo logra!
E inspirashon prinsipal tras di e adorno ta basá riba e para Phoenix di e mitologia Griego. E para Phoenix ta konosí pa ta asosiá ku solo i kandela, i e ta ser konsiderá komo un para inmortal. Esaki ta komo ku despues di su ‘morto’ un vershon mas mihó i mas fuerte ta nase di nobo for di e shinishi di su predesedor. Dor di esaki a konsiderá ku simbólikamente e para Phoenix ta un bon representashon di e proseso ku nos refineria ta aden aktualmente, esta di renkarnashon, renobashon i resiliensia.
E adorno di pasku na Post 5 ta un esfuerso konhunto di èks trahadónan, Refineria di Kòrsou (RdK), Curaçao Refinery Utilities (CRU) i ku e sosten finansiero di Caribbean Petroleum Refinery (CPR).
