Accion pa Stop Violencia riba nos isla

Ta trata di un Project Team, cu ta traha na bienestar di cada un ser humano, tanto den violencia, ayudo social, bienestar di hogar, ayudo den crecemento den trabou, tayer, empodera e hende muhe y/o hende homber, guia pa hoben di e comunidad LBGT, nos grandinan, union den famia, guia pa mayornan hoben, y te na unda violencia por hiba abo / nos den bida.

Xiomara Hernandez- Perdomo ta parti di e organisacion STOP THE VIOLENCE cu ta trahando cu varios organisacionnan na Hulanda,(Amsterdam, Den Haag, Groningen, Rotterdam ), Spaña, Panama, Colombia, Venezuela, Sint Maarten, Surinam, den diferente labornan ya menciona.

Na december 2018 caba nan tabata prepara pa 2019. E grupo cuminsa cu e projecto di STOP E VIOLENCIA, cual nan mester a cancela na momento cu COVID-19 a haci su entrada. E grupo a regresa Hulanda pa warda tur e proceso di COVID pasa pa asina bin bek cu mas energia pa haci e proyecto aki. Esaki ta door cu den e ultimo aña, casonan fuerte di violencia a sosode na Aruba. Esaki a haci cu esunnan na Hulanda a para un rato y tuma e iniciativa pa cuminsa pone Aruba riba e lista pa bin cu e proyecto aki.

Proyecto “STOP E VIOLENCIA na Aruba” ta basa riba e diferente puntonan. Den e proyecto aki e grupo tin shete punto:

1.  Mucha edad 6 pa 12 aña

2.      Hoben di edad 13 pa 17 aña

3.      Hoben adulto 18 pa 22 aña

4.      Famia di adulto

5.      Persona di tercera edad

6.      Comunidad LGBT

7.      Trabou/Adulto/Amistad

E plannan pa e proyecto na Aruba ta pa trece e norma- y balornan cu a bay perdi, treciendo bek e educacion cu nos grandinan a laga pa nos y treciendo e normanan cu tawata tin respet y un bon disciplina den formacion di e mucha. Nan ta habri pa traha cu tur hende, si tin un organisacion of un

Lo haci esaki di e siguiente manera:

*Planta un mata na cada scol como simbolo cu ta significa  cultiva e norma, balor,amor, respet y disciplina, pasobra unda cu tin respet y disciplina no tin violencia.

*Haci entrega di un simia na tur alumno. Un simia ta e simbolisa plant’e, cuid’e y balor’e hunto den seno familiar p.e. mayornan, welo, tanta, omo, pa mañan por tin un bon fruto, asina mayor y yiunan ta lanta bek como un famia cu balor y respet y amor.

*Peticion na Gobierno di Aruba pa compronde e preocupacion di hopi hende cu ta pasando den violencia, nan kier wordo scucha y sostene den nan peticion. Di e parti di e grupo nan deseo ta pa e scolnan pone den nan rooster, unda cu dos biaha pa siman un ora por papia cu e muchanan cu lantando pa duna les di norma y balor. Respet di un mucha, asina aki ta cuminsa planta e simia nan aki den nan. Corda esaki:un mucha felis y cu tur e puntonan aki ta bira un adulto exitoso.

*Trece un cooperacion cu e organisacion cu e vision pa STOP E VIOLENCIA aki na Aruba y traha cu e organisacion pa cuminsa educa, coregi y sostene un mucha den su manera di expresa, responde y ta na cada mayor pa cuminsa educa e muchanan pa asina nos tin un miho futuro pa nos muchanan y e mas importante ta sin violencia. Pa forma un bon cuidadano, mester tin cooperacion entre e mayor- y e docentenan y e organisacion cu ta brinda e servicio.

Hunto por STOP E VIOLENCA pa un miho Aruba.

Puntonan cardinal di e proyecto aki ta :

1.       Combersa cu e hobennan, mira kico ta nan preocupacion- y sentimentonan,  pakico nan ta forma parti di un GANG ki sentido tin.  Esaki ta pa nos conoce e hobennan, scoge dos of cuater of seis.

2.  Un hoben lo bay Hulanda pa participa den un tayer di Hoben pa Hoben pa bira un Jongeren Coach pa Aruba y asina nos ta cuminsa aborda e violencia meymey di e hobennan di Aruba.

3.  Cuminsa cu  mas proyectonan sano pa nos hobennan y principalmente cu e respet, disciplina, forma hobennan cu e meta pa futuro cu un bon preparacion y sin arma di candela entre nos hobennan.

4.  Trece mas entusiasmo den nos hobennan pa ta den mas  union y pa drenta den formacion pa nos hobennan pa bira polis- of bomberonan ehemplar, un deportista of bay forma parti di Plan Social (Kazerne) y duna honor na nos pais.

5.  E cambio tin cu cuminsa na cas cu sosten mutuo, di mayornan, familiarnan, tambe nos ta wak e docentenan. Esaki ta un plan/proyecto pa un tempo largo cu ta basa riba proceso te ora cu yega n’e obhetivo cual ta “STOP E VIOLENCIA”. Tur hende sa cu violencia no ta caba, pero si por minimalisa e violencia den nos comunidad.

6.  Un ciudadano kier wordo scucha, cual nos tur tin derecho di biba cu trankilidad, paz y cana liber sin miedo riba nos Pais Aruba.  Un parti hopi importante den bida di  un ser humano ta, ora e tin e necesidad di wordo scucha, vooral ora di problema  o algo ta molestie. Door di brinda un man, por scapa bida di un otro ser humano. Hopi cos por pasa den bida y cu por a wordo evita si a duna e atencion na tempo, momento crucial, pa no comete violencia.

7.  Un cos tambe cu ta hopi importante cu nos tin cu haci ta acepta ora cu nos ta fout y acepta ora e mucha nan ta fout y busca ayudo pa coregi e foutnan, un cos cu tambe ta bon pa evita violencia, cu ora algo no ta bay siña acepta, ora cu bo no sa cu bo no por cumpli no priminti, bisa cu bo no por y tin ora cu un splicacion nos tur ta compronde. Comunicacion ta hopi importante den nos bida.

Proyecto STOP E VIOLENCIA pa Aruba ta un exito cu apoyo di e comunidad, mester cuminsa ataca e reis cu ta e muchanan. Nan ta e yabi, e hobennan cu ta e futuro pa nos pais Aruba, conhuntamente cu mayornan, apoyo di parti di Gobierno, por wordo logra, pa trece paz. Mustra mundialmente cu Aruba tambe ta un Pais cu ta contra Violencia, asina nos por haya un bista positivo bek den nos sector turismo.

E grupo contra violencia lo bay tin varios manera pa recauda e fondo necesario pa asina yega na nan metanan. Lo bin c’un competencia di promo STOP E VIOLENCIA: e por ta colega, amistad, famia. Graba maximo un minuut. E por ta un actuacion of baile cu mensahe,  of mensahe so, cu ta papia di STOP E VIOLENCIA cu lo bay riba e portal di www.stvaruba.com como tambe tur e rednan social. E bon mensahe di STOP E VIOLENCIA cu mas like ta gana e premio efectivo. Pa bo participa den e premio aki mester tin e t shirt di STOP E VIOLENCIA, cumprando e t- Shirt aki bo ta yuda sostene e proyecto.

Tambe lo tin un Hersengymnastiek familiar o amigonan maximo 5 persona pa mesa, por cuminsa inscribi y duna nomber di bo team. E fecha lo ta dia 22 di april na Centro di Bario Tanki Lender y esaki lo cuminsa pa 7:30p.m. te cu 10:30 pm. Lo tin varios premio.

Mas aleu Hernandez- Perdomo a bisa cu nan lo tin un stickeractie y esaki lo ta 5 florin pa auto. Ora cu bo haya bo sticker di STOP E VIOLENCIA, pone e seyo di bo man riba e banner cu bo tambe ta afirma cu bo persona ta para pa pone un STOP NA VIOLENCIA na Aruba. Esaki lo ta tur atardi di 5.00pm pa 7.00pm. na Centro di Bario Tanki Lender.  Diasabra e grupo lo bay den un districto pa haci esaki tambe.  Pero sede di e grupo STOP E VIOLENCIA  lo ta na Centro di Bario Tanki Lender.

Nan ta cera e prome parti di e proyecto aki cu un evento final riba Plaza Betico Croes, dia 28 di april, cuminsando di 6.00 p.m. te cu 10.00 p.m. cu Varios obra nan teatral, escenario nan di violencia y te unda violencia por hiba bo y dañonan causa na esunnan cu ta rond di bo. Ta pidi pa tur aña e ultimo diabierna  di luna di april, por tin e actividad aki, como e  dia cu Aruba ta lucha  pa STOP E VIOLENCIA.

Violencia no ta paga e ta cambia bo bida pa semper, no lubida no ta bo bida so bo ta cambia pero tur bo ser nan kere. Hamas por drecha un daño haci.