Accion 21: Si gobierno a cumpli cu CFT lo por a refinancia debe pa scapa 150 miyon

Como parti di e cobertura amplio cu 24ora.com y TREMPAN a dunan na e apertura di aña parlamentario, a entrevista miembronan di tur cinco fraccion. Miguel Mansur di Accion 21 a enfoca su comentario riba e aspecto di finanzas publico, basa riba e discurso di Su Excelencia Gobernador Alfonso Boekhoudt caminda ta boga pa esakinan ta sostenibel. “El a duna un vision bunita di unda nos kier bay. Loke mi ta spera awo ta cu gobierno y parlamento duna respaldo y movecion riba e puntonan ey,” asina e parlamentario di oposicion a indica. 

Como ehempel el a duna cu presupuesto 2023 atrobe no ta cumpli cu e LAFT, ni tampoco cu CFT y presupuesto 2022 ainda no a yega na cumpli cu e recomendacionnan di ambos entidad. Mansur no kier pa e keda na palabranan di gobernador, e kier wak accion, specialmente di banda di gobierno. Mansur: “Y si gobierno no actua, mi kier wak movecion di mi coleganan di coalicion; realmente teniendo gobierno na cuenta.”

E parlamentario cu a caba di cumpli su prome aña di trayectorio den e organo mas halto di nos pais, ta convenci cu si Aruba no sanea finanzas publico, no tin chens di sanea nada otro. Pesey e ta spera cu e discurso di gobernador, skirbi pa Gabinete Wever-Croes II, no ta solamente palabra bunnita, pero cu por traducci den accion.

Riba e pregunta si ta wak espacio pa haya ayudo adicional di Hulanda, su perspectiva ta negativo. Atrobe el a duna un ehempel pa ilustra e diferencia entre Aruba y otro isla den Reino Hulandes. Corsou aworaki ta den e proceso di refinancia su debe cu Hulanda scapando 20 miyon. 

Pa e relato completo, lesa TREMPAN