Accidente pisa y detencion na Mahuma: Jan Poets y DJ Edson Tromp envolvi

Diasabra marduga alrededor di 2:00 am a sosode un accidente riba Green Corridor, net poco pabou di rotonde Mahuma. E autonan envolvi ta un mini van color blanco marca Suzuki y un Nissan March color blanco. Ambos tabata bayendo direccion pariba. Chauffeur di e Suzuki ta e conocido Jan Poets y su pasahero ta Dj Edson Tromp.

Ambos a cab’i traha un rato prome n’un fiesta y tabata direccion cas. Tromp a conta cu nan tabata bayendo suave pariba ora cu e March a bin tur cu tin, pone nan perde control y bolter algun biaha. E Suzuki a keda cu dos wiel den laira. Edson Tromp a logra sali for di e auto pero Poets a keda pega den auto sin por sali. E tabata reacciona pero a perde hopi sanger na sitio.

Cu yudansa di brandweer, a logra corta y kita algun cos for di paden di auto p’asina Jan Poets por a sali. A transporta Poets pa hospital p’e ricibi atencion medico avansa. Di otro banda, e chauffeur di e March a purba burla di e sistema y pidi pa atencion medico, keriendo cu nan lo transport’e pa hospital p’e no “deal” cu polis.

Na final, e paramediconan riba ambulance a constata cu no tin ningun motibo pa bay cu ne. Polis a haci un test di alcohol cu ne, pa cual el a surpasa e limite permiti. A detene pa stuur auto bou influencia di alcohol y a transport’e pa warda di polis caminda lo present’e dilanti un subfiscal. Ambos auto a keda completamente destrui.