Abogado Vito Carlo: Ministerio Publico tabata busca tur manera pa incrimina Benny Sevinger

Den e di dos dia di tratamento dje caso Avestruz, abogado mr. Vito Carlo a representa e acusado Frederic Every.

Tabata un defensa basta amplio unda cu el a concentra loke tabata e esencia di inicio di e caso aki, pero cu diripiente, despues na final, por a scucha fiscal bisa cu e no ta pone mucho atencion n’e parti civil, sino e otro parti ta importante p’e.

E abogado a conta cu a traha full e dossier y caso investiga bisando cu e proceso p’e personanan a haya erfpacht a bay contra ley y maneho di DIP e tempo ey unda cu Benny Sevinger tabata minister.

Durante di e investigacion cada bes, Landsrecherche tabata presenta un brochure como si fuera cu esey tabata e maneho y ta confronta tur e sospechosonan, bisando nan cu cos no a bay conforme maneho.

Pero e abogado a mustra cu cos a bay full robes, pasobra e maneho ey no tabata existi. Den 2018 gobierno Wever-Croes a introduci y a aplica e maneho ey cu nan ta referi na dje.

E personanan cu a haci e investigacion kico nan tabata papia. Diripiente, den e repliek ta bisa cu esey no ta importante.

Segun e abogado pa cuater aña largo a bis’e cu e ta importante y awo cu a mustra cu cos ta robes, a bisa e abogado cu e no ta importante.

E investigacionnan aki no ta ni e prome, ni e delaster haci p’e recherche di Hulanda. Tambe tabatin fiscal fo’i Hulanda a bin persigui y un hues di Hulanda of di Corsou a bin pa dicta. “No ta nos Landsrecherche,” segun Carlo. Nan ta verhoor, pero no ta haci investigacion.

Hopi biaha nan no conoce nos maneranan, segun e abogado. Nan no conoce nos sistema. P’esey hopi biaha nan ta bisa cu pasobra na Hulanda ta haci asina y na Aruba otro, cos mester ta robes. Esey ta e esencia di loke cu Carlo a bisa.

A bisa hues pa tene na cuenta cu e conclusionnan, loke Ministerio Publico y RST ta pone den e dossier, ta ilustra cu no ta bon y tin cu tene cuenta cu e no ta cuadra. Ta demostra cu mester tene cuenta cu e maneranan di Aruba y no haci como si fuera ta na Hulanda. Tambe tin cu tene cuenta cu e parti di civile recht.

PISKECHI DEN TARAY DI MINISTERIO PUBLICO

Vito Carlo a sigui splica cu su cliente t’e un di e promenan cu a scucha. Ministerio Publico ta di opinion cu su cliente ta mustra cu Sevinger tabata sa di tur cos.