Abogado mr. Arends-Marchena: Metemento di ex-Minister Otmar Oduber a infecta e caso Avestruz

Pa defensa di Rebecca Richardson no tin duda cu den caso Avestruz tabatin metemento politico. Tanto den e parti di denuncia como den e trayecto cu a sigui despues. Y esaki sigur ta haci cu e dossier completo di caso Avestruz ta contamina. 

E abogado a señala cu tras di cortina politiconan tabata envolvi den e trayecto di denuncia pa saca probecho politico di esaki.

El a duna e ehempel di loke a pasa na september 2017, ora cu partidonan POR y MEP a yega na poder. Dia 22 di februari 2016 dos miembro di Parlamento Tjon y Croes (ruman di Edmond Croes cu denunciante Jan de Ruijer ta menciona den su declaracion) ta entrega e rapport “Tereno Gate” na Ministerio Publico.

Loke cu ta hala atencion ta cu e rapport aki, ademas di documentonan horta for di computer di Leoncita Arends, tambe tabatin documentonan personal hinca den dje. Ta hopi preocupante e parti den e rapport unda cu e dos parlamentarionan ta pidi fiscal pa haci un feiten onderzoek, incluyendo un investigacion financiero tecnico y cu esaki mester forma parti di e feiten onderzoek y cu mester conduci cu Ministerio Publico ta tuma medida pa loke ta maneho riba e asunto aki. Y pa pone e ‘cherry riba e bolo’, nan ta bisa Ministerio Publico den e rapport cu si nan no tin placa, avisa nan cu lo percura pa nan haya e recursonan financiero. 

For di carta di dia 19 di april 2019 di Procurador General (PG) dirigi na Landsrecherche, ta resulta cu PG na maart 2018 caba a duna ordo pa un investigacion penal. Pues menos di un luna despues di a ricibi e rapport for di e dos parlamentarionan. A apunta e dis fiscalnan Bos y Gerretschen, den nomber di PG, pa actua. 

Dia 4 di october 2019 lider politico di POR, Otmar Oduber, a manda un carta pa Landsrecherche y PG interino Deutekom. Esaki el a hacie como Minister di Infrastructura. Den e carta aki por saca afo cu na mei 2018 tabatin un combersacion cu PG, Hoofdofficier y Minister di Infrastructura Oduber riba e caso aki y a papia di tur e sospechosonan envolvi. Tambe por saca for di e carta aki cu e meta di e combersacion tabata pa papia riba e personanan liga na e ex-minister cu diferente biaha a haya terenonan comercial, den companianan lanta pa despues bende e accionnan di e companianan aki pa sumanan halto. Pues riba e investigacion aki cu tabata andando di maart 2018. 

Tambe ta resalta cu ex-Minister Oduber a skirbi den e carta cu Ministerio Publico, durante e combersacion, a bis’e cu no ta posibel pa traha cu copia. P’esey fiscal a sugeri na e minister pa laga haci un investigacion forensico. A agrega esaki na e carta cu Oduber a manda pa PG.  Pues e mesun feitenonderzoek y forensico cu e dos parlamentarionan a propone. E investigacion a wordo haci door di un funcionario halto cu tabata traha na ministerio di Otmar Oduber.  

Pues durante e inverstigacion Ministerio Publico tabatin contacto cu politica riba e caso aki. Tanto e parlamentarionan como e minister a duna nan contribucion na e persecucion y e forma con mester atende cu e investigacion. Esaki no ta cuadra cu e informacion cu Ministerio Publico mester suministra na Minister di Husticia. E contacto aki no ta mustra tampoco manera di un contacto di trabou. E Minister di Infrastructura no ta carga ningun responsabilidad pa husticia. Echo ta cu no mester tabatin contacto entre e Minister di Infrastructura y Ministerio Publico riba e caso mes, di ningun forma y pa  nada. Pero esey a sosode!

E abogado a bisa cu door di e intervencion politico den e caso penal aki, a mishi cu e separacion di poder cu mester existi. Por lo tanto no por papia di un proceso husto manera ley ta prescribi. 

“No por conclui otro cu den e caso aki, Ministerio Publico a actua en pugna cu principionan di husticia … y a sirbi interesnan politico. Elementonan politico a contagia e proceso penal aki di tal forma cu no por papia mas di un proceso husto. Metemento di un minister, for di e ministerio ta bay en contra di e principionan di Trias Politica y ta nifica cu un violacion di e principionan aki ta stroba e proceso husto exigi.”

Pa e motibonan menciona, el a pidi pa declara su cliente liber.