Abogado Carlo: Fiscal ta midi cu dos midi ta hiba Carlo Mansur dilanti pero no su dos socionan

Carlo Mansur ta un di e acusadonan den caso Avestruz y tin di haber cu e dossier Damira, unda a haya un tereno comercial pero cu despues a pasa e accionnan pa otro persona. A cita Mansur pa complice di malversacion y complice den falsificacion di documento. E ultimo fiscal ta bisa cu nan a pidi e tereno y e intencion no tabata pa keda cu ne pero bende esaki via di e accionnan cu e tabatin den e compania doño di e tereno. Esaki a sosode den e periodo di december 2014 te cu december 2016.

Segun Ministerio Publico, el a comete e delitonan hunto cu e acusadonan Ninosca Nuñez, Gaby Werleman y Benny Sevinger. Prome cos straño den e caso aki ta cu e acusado ta bisa e no a haci e peticionnan pa Lizner y / of Damira na titulo personal. For di inicio e tabata un proyecto di e empresanan menciona. Den e caso aki tambe fiscal ta comete e eror di unifica e director cu e compania y ta bisa cu Carlo Mansur a comete actonan castigabel y na titulo personal. Defensa hiba pa abogado mr. Vitto Carlo ta bisa cu nan no por compronde te dia di awe con nan a yega na e conclusion ey. Ni den e rekisitorio nan a logra haya claridad riba e punto aki. Pa e motibonan aki a pidi pa declara su cliente liber. 

Henter e caso ta basa riba e echo cu supuestamente for di prome instante no tabata e intencion di Ninosca ni Gaby pa desaroya e proyecto, segun nan palabranan. Damira cu a pidi e tereno te dia di awe ta doño di e tereno y ta den desaroyo di e proyecto pa cu esaki. Tur formulario el a yena corectamente y nunca a yena informacion cu no ta corecto. Damira a cumpli cu tur e condicionnan. Mientras cu benta di accionnan den un compania cu tin derecho di opcion riba un tereno cu metanan comercial no ta contra di e maneho y/of ley. Abogado Carlo a splica cu dependiendo di contenido di e condicionnan di opcion, por bende e accionnan cu of sin aprobacion di e minister encarga cu infrastructura. Y esey e abogado a enfatisa, a sosode den e caso aki tambe. 

Den mundo di negoshi mester probecha di oportunidadnan comercial. Si un partner, financiado, kier cumpra bo parti, mester haci evaluacion pa bandona e proyecto tempran pa haci un margen di ganashi chikito. 

El a cuestiona e echo con fiscal ta midi cu dos midi. Asina por ehempel el a bisa cu tin cantidad di parcelanan, entre otro hotelnan, cu pa sumanan grandi y segun e derechonan di opcion, a bende nan sharenan. Ministerio Publico no a cita e hendenan aki, no a haci investigacion contra nan y tampoco a hiba nan dilanti mesa berde. 

Den e caso aki tabatin e co-sospechosonan Osorio y Henriquez, kendenan como accionista den Damira, a gana placa ora a traspasa e accionnan, pero no a haya citacion. Den casonan igual, Ministerio Publico no ta actua di mesun manera y ta bay en contra di e principio di trato igual. 

Di ningun forma, e abogado a bisa, fiscal por demostra cu su cliente a actua a titulo personal y no tabatin e intencion pa desaroya un proyecto. Y mirando cu Ministerio Publico a actua contra principio di bon ordo di proceso, pa cual mester declara nan acusacion no admisibel.