A.T.A. a reuni cu ekipo di Merca y Canada riba plan di mercadeo pa 2023

Como parti di A.T.A. su strategia pa diferente mercado, tin varios momento durante aña unda ta reuni cu e socionan di Aruba, e agencianan den e diferente mercadonan como tambe ekipo di A.T.A. den e mercadonan.

Recientemente a tuma luga e ‘North American Marketing Update Meeting’, unda cu a presenta e plan y obhetivo pa 2023 n’e socionan local. Probechando di tin tur hende na Aruba a hiba tanto e agencianan como e ekipo di Merca y Canada pa conoce un tiki mas di locual Aruba tin di ofrece.

E reunion a tuma luga den e ballroom di Hilton Aruba Caribbean Resort & Casino, caminda cu tanto e agencia di PR; Zeno como tambe agencia di mercadeo; Big Village, a duna un presentacion extenso di kico lo por spera pa 2023 den e plan di mercadeo pa Aruba. Esunnan presente por a presencia algun idea nobo y e otronan ‘out of the box’ pa mercadea e isla di Aruba den exterior y asina atrae ainda mas bishitante pa nos isla. Pa clausura e meeting cu e ekipo Norte Americano a realisa un tour na San Nicolas y experencia e preparacionnan cu ta tumando luga p’e proximo ‘Art Fair Festival’ como tambe a bishita e trapi na Rogers Beach cu ta bay cuminsa su proceso di embeyecemento.

Despues di un dia di reunion extenso di mercadeo a sigui pa topa cu e ekipo di benta pa dos dia mas di reunion pa discuti e strategia di benta pa 2023. Durante di e dos dianan aki a enfoca riba expansion di relacion cu socionan hotelero como tambe strategia pa atrae e bishitantenan di varios ‘niche’ cu A.T.A. kier trece pa Aruba. A splica un poco tambe con e departamento di Accounting, Trade, Branding y Niche lo bay traha y nan punto di enfoke den 2023.

Compara cu 2019, na 2023, ta premira cu cantidad di bishita lo recupera 105%, entrada di turismo lo recupera 117%, entrada di cambernan di hotel segun cifranan di AHATA lo recupera 100%, cantidad di bishitantenan crucero lo recupera entre 90-100%.

Pa clausura e reunionnan cu e ekipo di benta, a realisa algun bishita di inspeccion. Aki e ekipo a cera conoci cu Embassy Suites cu pronto lo habri, a bishita Aruba Airstream cu su concepto unico di ‘glamping’, sigui pa Aruba Ocean Villas cu a presenta nan ultimo desaroyonan.

Por mira bek riba un siman fructifero sigur pa A.T.A. pero tambe pa varios socio di Aruba, agencia den e diferente mercadonan como tambe ekipo di A.T.A. den e mercadonan di Norte America y Canada. Por mira riba un 2023 hopi fructifero pa locual ta trata turismo pa Aruba.