A subi caminda prome cu tempo: Accidente cu basta daño y dos persona herida

Dialuna anochi alrededor di 11:15 pm a sosode un accidente na altura di e t-kruising cerca di Price Smart, cual ta Avenida Milio Croes cu Sabana Berde. Un total di dos auto ta envolvi den e accidente aki. Un Honda color shinishi modelo Civic numera A-66542 y un Ford color shinishi modelo F-150 numera A-52939. Tanto e chauffeur como e pasahero di e Ford a resulta herida. Ambulance a trata ambos na sitio.

A combersa cu ambos chauffeur, tur dos a confirma cu e pickup tabata biniendo for di pabou y a bay lora pa drenta Avenida Milio Croes. E chauffeur di e Honda a ‘take a chance’ y a sali prome cu tempo, pa cual a dal contra di e pickup. E impacto tabata asina fuerte cu hasta e airbag di e Honda a sali. Mientras cu e polisnan di districto di Playa a cera caminda, e specialista a documenta e accidente aki hunto cu personal di seguro.