A purba evita: Aumento den prijs di butishi di gas a bin na mal ora

Temporada di fin di aña ta den porta y hopi hende lo busca manera di gana un tiki cen extra door di bende cuminda of ayaca. 

Tur esaki a bin abou, na momento cu Minister Geoffrey Wever di Asuntonan Economico, hunto cu e director di Arugas, Paul Arends, a anuncia cu lo tin un cambio den e prijs di butishi di gas. 

Tabata durante un conferencia di prensa diahuebs mainta, cu Gobierno di Aruba a anuncia cu entrante dia 15 di november proximo, prijs di gas lo conoce un aumento. Un noticia cu a cay manera un bom cerca e comunidad ya cu e ta bin na mal momento.

Riba esaki Minister di Asuntonan Economico, mr. Geoffrey Wever a indica Arugas tin algun luna caba cu el a haci peticion pa un aumento di boter di gas. Pero a haci tur loke tabata na su alcance pa wanta e decision aki, pa wak con leu por bay sin cu e tin un impacto negativo riba e ciudadano. 

Na dado momento, pa Arugus tambe e situacion ta bira insostenibel y nan no por want’e mas. Mester a evalua si kier garantisa e suministro di gas pe comunidad of aumenta e prijs. E decision, si un dado momento, no tabata un obligacion, pero si Gobierno no a permiti e aumento, lo mas logico tabata cu Arugas lo a bisa cu e no por sigui cu e distribucion di gas p’e comunidad. Esey lo tabata tin un impacto mucho mas negatvo.

Otro partido no por drenta e mercado, ya  cu e prijs ta asina abou di e prijs di mercado, cu basicamente esun cu drenta e mercado lo core cu perdida for di e prome dia. Pero esey no lo tabata un alternativa realistico, cu lo laga un otro compania bin hacie. E prijs caba ta bou di nan kostprijs pa algun luna caba.

For di 2006, no tabata tin un ahuste rib’e prijs. Y mirando e desaroyonan internacional, “Arugas a haci lo posibel pa wanta e decision aki. Pero a yega e momento pa tuma un decision. 

Aruba no ta produci gas, no ta produci petroleo, pero ta cumpra esakinan riba mercado internacional. Y tur por lesa y scucha noticia internacional cu por sigui e desaroyonan. 

Asina tambe, pueblo ta hay’e confronta c’un otro aumento, net den porta di fin di aña.