A papia riba diferente topico: Polis di Bario a reuni cu habitantenan di Oranjestad

Diamars anochi Cuerpo Policial Aruba (KPA) a organisa e evento di cera conoci cu Polis di Bario Oranjestad. Hopi habitante di Oranjestad a presenta na e encuentro aki y a haci diferente pregunta. Pa KPA e encuentro aki tabata uno exitoso.

Ramon Arnhem, altocomisario, a expresa di a haya e encuentro cu bario di Oranjestad uno hopi bon. Tabatin combersacion critico cu esunnan presente, pero esey tabata algo necesario. E combersacion mester tabata un tiki duro, pasobra e problemanan mester bin na mesa ya cu siguridad ta importante. E ta kere cu e sentimento tabata bon, e hendenan a hay’e bon cu nan por a trece dilanti nan problema. Ta trece e problemanan dilanti, pero e hendenan ta spera cu polis haci algo cu nan.

Diferente punto a bin dilanti, pero e altocomisario a ripara cu hende a bay mas riba molester di persona cu ta keda rond eybanda, hende ta haci desordo, no tin respet p’e hendenan y ta contesta na un forma brutal cu e habitantenan. E taxinan cu ta core ey banda, ta draai auto y hopi mas.

Pa loke ta encuentro di bario, segun e altocomisario, e idea ta pasa den tur districto. Noord ta e ultimo y awo ta buscando un fecha pa haci e encuentro. Tambe e ta invita e bario di Noord pa presenta na esaki. E ta kere cu mester sigui organisa tipo di encuentro asina aki. Siguridad ta pertenece na henter comunidad. Ta importante pa bini hunto y papia, ta trabou di polis pa brinda asistencia.

Nan ta bay sigui haci esaki, ta bay sigui haci esey structural. Pero ta bay sinta hunto pa mira kico tur nan a siña dje encuentro aki.

Robert Vos, Polis di Bario Oranjestad, a indica di tabata hopi contento con e encuentro a bay. Basta persona a presenta y tambe a bin cu hopi pregunta riba nan. Awo nan tin hopi cos pa bay haci. Nan a bay eynan mas tanto pa auto cu ta core duro.

Vos a sigui splica cu nan tin un presentacion mas na Noord, pero nan ta bay cuminsa analisa nan bario. Pero asina cu e encuentro na Noord finalisa, lo sinta cu tur Polis di Bario pa atende e problemanan. No ta cuestion di cada bario su so, pero ta bay traha un team pa atende cu tur hunto.

Pa lesa mas subi TREMPAN.