A lanta Bonstar pa uni tur Boneriano na Aruba

Den fin di siman a tuma luga un evento special. Aki ta caminda cu un grupo di amigo a funda un organisacion bou number di Bonstar. Bonstar ta para pa ‘Bonaire stars’, pues e streanan di Boneiro.

Rolindo Dortalina ta fungi como e cabes di e grupo. Durante un encuentro cu 24ora.com, el a comenta cu tin un falta di union den e Bonerianonan na Aruba. Manera ta conoci, ya caba nan ta un club na San Nicolas, pero awo ta mas facil pa esunnan di Playa y pabou di brug por ta mas cerca di otro. E clubhuis di e Bonstar ta situa patras di Macuarima 16H. Ey ta caminda cu e Bonerianonan ta invita pa bin hunto y pasa un rato ameno.

Bonstar pronto lo organisa diferente evento p’asina trece tur e Bonerianonan biba na Aruba hunto bek. Por pensa aki riba wega di futbol, piscamento, domina y mas. Comosifuera poco, ya caba Bonstar a ricibi donacion di uniform pa participa den wega di veterano di futbol. Dortalina a indica cu mirando e temporada di FIFA Mundial, ta net un bon oportunidad pa trece e comunidad hunto.

Segun Dortalina: “Si mira e Chines, Peruano y Latino, tur tin nan organisacion pa mantene nan tradicion y cultura di nan pais bibo, aunke nan ta leu for di cas.” Esey t’e idea tambe di Bonstar, pronto por spera mas movecion di e organisacion nobo aki bou guia di Rolindo Dortalina kende ta un Boneriano biba na Aruba.