A hit container yena cu cerbes di Aruba Trading Company

Diadomingo anochi polis a presenta cu urgencia den e area di Schotlandstraat p’un caso di ladronicia. A ricibi informacion cu a mira por lo menos tres pa cuater homber cara tapa den cercania di e tereno di Compra. Na prome instante a kere cu lo a horta den e containernan di Compra, pero no tabata asina.

A topa cu un container na skina di Schotlandstraat cu Frankrijkstraat habri y cu candal kibra benta abou. Mientras cu polis tabata busca e supuesto ladronnan, a topa cu un mucha baldadi cu a cuminsa core ora a mira polis. Mirando su comportacion, a start un persecucion su tras y a logra detene. No ta kere cu e hoben ta envolvi den e caso pero debi na su actuacion straño, a bay cu ne warda.

Parce cu a bay cu por lo menos binti pa trinta cah’i cerbes di marca Coronita. E compania cu ta representa e dicho cerbes na Aruba ta Aruba Trading Company. Ta sospecha hasta cu por ta un ‘inside job.’ Na yegada di e hefe di compania di siguridad, a start un discusion entre e cu e miembro di siguridad cu t’esun cu ta encarga pa cuida e containernan. A cuestion’e dicon no bati alarma na tempo. Investigacion lo saca afo kico exactamente a sosode.