A gara trio Venezolano transportando droga pa Aruba

Diabierna anochi a tuma luga un accion riba lama. Wardacosta di Caribe Hulandes, den cooperacion cu Cuerpo Policial Aruba, a topa cu un boto sospechoso den awa teritorial di nos pais. A dun’e señal pa para, pero el a nenga y a aumenta su velocidad, pa cual a start un persecucion mesora riba lama.

Na momento cu a logra para e boto, a bin topa cu tres persona, cu varios paki di droga. Consecuentemente Wardacosta a detene tur tres sospechoso, procedente for di Venezuela y tambe a tuma e droga den beslag.

Di acuerdo cu e maneho tradicional, Wardacosta no ta haci investigacion, sino ta gara e sospechosonan y ta entrega nan y e droga corespondiente na e departamento conoci como “Unit Georganiseerde Criminaliteit (UGC)” di Cuerpo Policial Aruba. Nan ta interoga e sospechosonan y ta sigui cu e investigacion.

Mester menciona cu ultimamente Wardacosta ta hopi atento y ta garando un cantidad di sospechoso riba lama. Cu e maneho stringente aki ta evita cu e droga ta yega nos isla, sea pa uzo local of pa manda pa Merca of Europa. Nos posicion geografico ta ideal pa cartelnan di droga uza como trampolin. Pero cu e profesionalismo di Wardacosta, ta haci e trabou di e bandidonan tur dia mas dificil y peligroso.