A devela obra di arte cu mosiac n’e trapi di Rodgers Beach

Dialuna atardi Minister di Turismo y Salud Publico tabata den un conferencia di prensa extra ordinario na Rodgers Beach en conexion cu e trabounan cu a haci n’e trapi. Manera ta conoci e trapi a haya un renobacion completo entrega na maart di e aña aki. Minister Oduber no a para eynan. E mandatario su idea di comienso tabata pa haci esaki un atraccion pa nos turistanan. Un di miho idea tabata pa haci obra di arte cu mosaic n’e trapi. 

Pa haci e idea aki posibel a acerca e grupo di artista guia pa Tito Bolivar, pa por realisa e proyecto aki. Desde dia 28 di october ultimo cu a anuncia e proyecto di mosaic n’e trapi di Rodgers Beach, awo por bisa cu esaki a keda entrega. Un proyecto chikito pero hopi bunita cu sigur lo tin un balor agrega na nos producto Aruba. E ta un bunita caminda pa nos local y turistanan saca un potret pa pone riba media social cu ta hopi na moda awo, esaki alabes lo sirbi pa mercadeo di Aruba como destinacion.

Mescos cu na Baby Beach, e embeyecimento di Rodgers Beach tambe ta forma parti di henter e masterplan cu tin pa e area di Sero Colorado. Minister Oduber semper a kere den e potencial di San Nicolas pa bira e segundo capital di turismo na Aruba. Dentro di poco e fase III di e proyecto di Baby Beach caminda ta bay eleva henter e area rond di e beachnan. Semper teniendo na cuenta e importancia di conserva nos naturalesa, creando asina un desaroyo di embeyecemento di e area na un manera sostenibel.

E proyecto di trapi a keda financia pa Aruba Tourism Authority (ATA) y e lo eleva e producto Aruba como tambe haci Rodgers Beach mas accesibel pa esunnan cu ta biba den bisindario. Minister Oduber ta sumamente contento con bunita e trapi a keda.