A detene cinco hende na Venezuela: Ta acusa Rubiano den caso di Venezolana perdi riba lama

Caso di e Venezolana  Leidy Yohana Salazar De Moreno di 40 aña, a dal un buelta hopi serio y autoridad a efectua varios detencion relaciona cu su desaparicion. Dia 22 pa 23 di maart a ricibi for di Venezuela un denuncia via un e-mail encuanto desaparicion di un ciudadano Venezolano. E informacion a drenta di parti di e centro di salbamento y coordinacion di operacion maritimo di Wardacosta di Caribe Hulandes. 

Segun a indica, e dama aki lo mester a sali den boto for di Puerto Escondido, Falcon, Venezuela pa Aruba di forma ilegal, a sali dia 22 pa dia 23 di maart den ora di marduga, cu un cantidad di shete persona, cu a tira nan mes den awa pa aproximadamente 6:00 am, 1,4 kilometer leu for di costa y landa bay tera firme, di cual solamente seis a yega, reportando e ultimo como desapareci.

Den transcurso di dialuna a drenta otro informacion di autoridad Venezolano, cu den esfuerso pa mantene tur strategia efectivo pa minimalisa cualkier tipo di delito cu ta pone na riesgo e bida di e poblacion Venezolano, polis a detene cinco hende (homber) responsabel di e desaparicion di Leidy Yohana Salazar De Moreno.

E detencion a tuma luga na e sector Banco Obrero via e delegacion municipal di Punto Fijo, estado Falcon. Funcionario di e Cuerpo de Investigaciones Científicas, Penales y Criminalísticas (CICPC) a realisa investigacion/patruya cibernetico ora a topa cu informacion riba desaparicion di e dama Salazar riba un website.

A cuminsa yega na contacto, entrevista, analisis di telefon y for di akinan a logra identifica y detene e responsabelnan di e desaparicion di e victima Salazar. Te na e momento aki tin cinco persona deteni, cual ta Edirso Segundo Colina Rodríguez (42 aña), cu dos registro di contrabanda riba su nomber, José David Colina Borges (25 aña), José Daniel Colina Borges (25 aña), Alcides Rafael Lugo Martínez (24 aña) y Eudomar José Arias Guanipa (30 aña).

E intencion tabata pa yega Aruba. A ofrece e victima di por transport’e den boto, den un lancha for di sector Puerto Escondido Falcon te Aruba. E transporte lo mester a yega te lama grandi pero na momento cu nan a topa cu wardacosta, a opta pa pasa e tripulantenan over na un otro boto cu ta ainda nan no a identifica. E boto aki lo ta procedente di Aruba.

Informacion cu autoridad Venezolano tin ta indica cu lo ta trata di un persona di nacionalidad Hulandes cu tabata capitan di e boto e momento ey. Ta trata aki di Reangelo Stamper, cu ta pendiente su detencion na cualkier momento. E tabata compaña pa otro antisocial cu tambe ta busca pa autoridad, José Luis Núñez (46 aña), miho conoci como ‘Fiqui’, cu por cierto tambe tin un record criminal.

Te cu awo ningun hende tin informacion di unda e victima lo por ta y si acaso e ta na bida ainda of no. Como evidencia a tuma den beslag un boto peñero cu ta hiba e nomber di ‘D Mis Nietos’, un motor di boto como tambe un telefon (Redmi Note 10), tur propiedad di Edirso Segundo cu tambe ta doño di e lancha. E caso actualmente ta den man di ministerio publico. Ta spera cu den cualkier momento lo tin un of otro detencion relaciona cu e caso aki na Aruba tambe. E fuente di e informacion aki ta bin di: CICPC Venezuela.

Pa locual ta trata e nomber cu a menciona den e comunicado di autoridad Venezolano, tin di remarca cu e no ta un persona desconoci riba lama, ni pa autoridad Venezolano. Reangelo Stamper tabata entre e tres Rubianonan cu tabata deteni na Venezuela.

Dia 3 di maart 2020 e tres amigonan cu a sali for di Savaneta pa bay busca Pau Martijn cu a perde riba lama. Nan a sali pa Colombia pero pa kibocacion a drenta na un boca robes y a resulta cu tabata Venezuela, pa cual Guardia Nacional a wanta nan na un base militar pendiente aprobacion pa nan por sali pa Aruba.

Despues di basta intervencion via abogado a logra nan liberacion cu nan por a regresa bek Aruba. Tabata trata di Reangelo Stamper di 32 aña di edad. E tin piscamento como su pasion. Tambe Franklin Vos di 49 aña di edad y Robert Laveist, un bon amigo di nan, casi ruman.

Awo na 2023 un biaha mas e mes un nomber ta bin dilanti relaciona cu desaparicion di un persona cu kier a drenta nos isla di forma ilegal y cu muy probablemente lo a perde su bida riba lama. Autoridad local no a duna informacion oficial ainda riba e caso serio aki pero ta spera cu pronto lo bin claridad si e Rubiano Stamper ta envolvi si of no cu e delito serio aki.