A dal security cu boter y core bay: Polis a persigui y detene trio

Diasabra marduga a sosode un caso di agresion den Weststraat. Aki ta caminda cu security di un club a saca un hoben for di negoshi pa su mal comportacion. E hoben no a keda contento y a dal e miembro di siguridad cu un boter te herida. E tabata compaña pa dos otro persona.

A core drenta auto y purba core bandona sitio. A drenta un auto marca Toyota color cora y bandona sitio. Na nan salida, polis a topa cu nan riba Boulevard y a start un persecucion nan tras. A bay den Weststraat, drenta Visstraat, djey drenta Ranchostraat den verboden y na crusada di Emmastraat e chauffeur a bay dal contra di un patruya di polis cu a changa nan.

Mesora a baha nan for di auto y manda nan plat na suela. A bay over mesora n’e proceso di detencion. A detene dos hende homber y un hende muhe. Den un transporte policial a bay cu nan warda di polis caminda lo presenta nan dilanti un subfiscal. Tanto e Toyota como e patruya di polis, a ricibi daño na parti dilanti.

Ambulance a presenta den Weststraat caminda e situacion a surgi pa brinda atencion medico n’e security, pa cual na final a bay cu ne hospital p’e ricibi atencion medico avansa.