A celebra den gran forma: Diana Antonette mas di mita siglo ta dunando les

Diasabra ultimo Cas di Cultura tabata sede di e bunita celebracion di 55 aña di Scol di Baile Diana Antonette. 

Riba e dia aki a recorda tres cos: 55 aña di Scol di Baile Diana Antonette, 40 aña di grupo di baile Teatro di Danza Arubano y Dia Internacional di Baile. Como docente di baile, Diana Antonette a recorda cu ta hopi mucha a haya les cerca dje. Tin un grupo cu a cuminsa na 1968, cu e tempo ey tabata hopi mucha. Awendia nan ta pensionado, pero ainda ta activo den baile. Nan ta baila folklore, salsa y hopi mas. Ta varios generacion el a duna les. 

Pa por duna les, esaki ta rekeri hopi pasenshi. Pero pa Antonette, e pasenshi aki ta bin di e amor pa baile. Facil e no ta. Vooral awendia tin falta di disciplina, di parti di e mayornan, ya cu ta akinan e ta cuminsa. E mayornan mester bira mas streng. Ta asina hopi importante pa por haci arte. Si un persona tin cualkier persona cu tin un limitacion corporal of cualkier otro, arte por yuda. Tin varios sorto di arte y esaki por yuda.Mester tin mas atencion na arte y cultura riba nos isla 

“Personalmente mi ta haya cu e ta bayendo atras. Tur dia ta grita, ‘cultura, cultura’, pero e no ta mira un desaroyo positivo.”

GRUPO DI BAILE TEATRO DI DANZA ARUBANO
Diana Antonette ta tambe directora di e Grupo di Baile Teatro di Danza Arubano, cu e aña aki ta cumpli 40 aña. El a lanta e grupo di baile na 1983 y a biaha cu ne rond mundo. El a lant’e pasobra cu p’e tabata importante pa haci nan cultura, nos bailenan. Ta cosnan cu, tempo cu el a bay studia, e no tabata sa. Ora cu el a bin bek, el a bin conoce Aruba su bailenan. El a lanta e grupo pa promove nos bailenan manera dia 18 di maart, Dia di Betico, Dia di Rey, Dera Gay. Antonette ta conta cu el a hasta di baila dande. Por baila tur cos.  

E grupo di baile a baila hopi na hotel, el a biaha hopi pa varios pais rond mundo. Merca, Francia, Hulanda, ful Caribe, Venezuela, Colombia. Den e ultimo temponan no ta bin den publicidad c’un grupo di baile ta bay haci presentacion afo. Pero e grupo di baile Teatro di Danza Arubano a haya un invitacion for di CID (Francia), pa bay haci un presentacion na Grecia durante un evento folklorico di varios pais. Y pa bay e evento aki, e grupo mes mester cubri tur nan gastonan. Pero nan no tin fondo y pa haci un recaudacion di fondo e tempo ta cortico. El a informa e organisacion cu e aña aki no ta posibel, pero si pa otro aña ta spera di por participa 

SHOW DI BAILE
E show di e anochi aki tabata uno hopi varia. Tur alumno cu ta tuam les di baile cerca dje, a baila. Cuminsando for di e chikitonan, for di 4 aña. A pone hopi enfasis riba naturalesa y rond mundo tin hopi cos pasando. Ta importante pa ta mas consciente pa cuido di naturalesa y esey tabata e mensahe. 

Despues a bin diferente baile, street dance, enfocando riba e hubentud. Tambe tabata tin clasico y baile moderno. A cera e anochi c’un potpourri di baile folklorico. Ta importante pa e muchanan practica arte cu ta asina hopi importante. 

CONSEHO
Por ultimo, Antonette a bisa cu Aruba su folklore ta importante, ya cu esaki ta nos identidad. Tur pais tin su baile folklorico. E ta forma parti di ken nos ta. Esaki ta forma parti di nos herencia cultural y den e ultimo añanan, no tin promocion di nos cultura. 

Hopi biaha el e yega di duna tayer na diferente grupo di baile, conta historia di nos folklore, di unda el a bin. Hopi baile a bin di afo. Ta e Hulandesnan cu a bin, a trece e bailenan folklorico di Europa y Aruba a adapta esakinan na su sistema. Awendia no ta mira hende ta baila wals, mazurka y polka. Loke ta di Aruba ta e Dera Gay

El a recorda cu antes su mayornan tabata gusta fiesta y el a siña baila wals cu su tata. For di chikito el a siña baila. Pero e no tabata sa cu esey ta su cultura. Ora cu el a bay studia, nan tabata puntr’e kico ta su folklore. Eynan el a bin compronde cu cada pais tin su bailenan y p’esey e ta puntra for di dia cu el  a lanta e grupo, pa promove Aruba su bailenan. 

Antes e tabata uza musica di Corsou, pero for di dia cu Aruba a haya su Status Aparte, e ta purba di uza piesa di Aruba mes. Pero tin un problema pa haya piesa nobo. El a pasa hopi trabou pa el a hinca e show den otro. E ta puntra su mes, ta kico a pasa cu nos musiconan.

E por compronde cu Aruba su musiconan, nan edad ta subi. Pero e ta puntra su mes na unda e muchanan jong ta? E ta haya hopi falta di musica nobo, nos hendenan por. 

Unda cu tin boluntad, tur cos ta posibel.