Minister di Turismo y Salud Publico sr. Dangui Oduber ta informa comunidad riba e ultimo cifranan di turismo cu a drenta for di Banco Central. Aña 2022 tabata e aña di recuperacion y esaki no por a bay di un mihor forma. Aruba di berdad ta un isla resiliente y e cifranan ta demostra esaki tambe.
Aruba por ta orguyoso di a registra un grado di recuperacion di nos turismo di 98.4% den comparacion cu aña 2019 cu tabata un aña record den turismo, esaki ta excepcional y Minister Oduber ta hopi satisfecho cune.
E tourism receipt (credit) cu ta wordo midi pa banco central a conoce un crecemento di 18% durante e prome(1) cuartal te cu e tercer(3) cuartal di aña 2022 den comparacion cu e mesun periodo di aña 2019. E tourism credit tabata 3.2 biyon florin y esaki tabata un crecemento di 500 miyon florin!
Esaki ta nifica cu den aña 2022 e turistanan a laga mas placa atras den nos economia cu na aña 2019.
Den aña 2022 Aruba a keda reconoci pa ta e di dos pais na mundo cu mihor a recupera su turismo despues di e temporada di pandemia.
Minister Dangui Oduber ta felicita pueblo di Aruba cu e bunita resultado aki, e ta algo pa ta orguyoso di dje. Ban sigui engrandese nos turismo.
